अर्जुन यावा

गाउँको याद आयो

धेरै भएछ शहर पसेको, गाउँको याद आयो
साथी-भाइ र गाउँ-घरको, आज याद आयो
सुखै होस् शहरमा, प्यारो गाँवै हुँदोरैछ
धेरै पछि आज फेरि, गाउँको याद आयो॥
रहर होइन शहर पस्ने, लहर यस्तै आयो
रहँदै-बस्दै जाँदा शहर, प्यारो हुँदै आयो
दुःख पर्दा साथ दिने, शहरमा को पो हुन्छ
धेरै पछि आज फेरि, गाउँको याद आयो॥
घाँस-दाउरा र मेलो-पात, फेरि याद आयो
रन-वन घन्काको पल, सम्झनामा आयो
फेरि कहाँ आउला त, फर्केर ती समय अब
धेरै पछि आज फेरि, गाउँको याद आयो॥
के गर्दैछिन् मेरी आमा, के गर्दैछन् बाउ
भन्दै होलान् आज दुवै, फर्की घर आउ
बिरानो भो गाउँ अब, बालापन बिताएको
धेरै पछि आज फेरि, गाउँको याद आयो॥
-अर्जुन यावा, 14-16 जनवरी 2014