अर्जुन यावा

कृषि-बागवाणी प्रदर्शनी  र साझा दायित्व

‘काग करायो भनेर कागकै पछि लाग्नु हुँदैन।’ यो उक्तिलाई यदि कसैले पनि मनमा लिनसके हामी कहिल्यै कतै अल्मलिरहनु पर्ने हुँदैन। आफ्नो क्रमक्षेत्रमा कसैले बाधा दिनसक्दैन। कराउने कराई नै रहन्छन्। विरोध गरिरहन्छन्। त्यस्ता विरोधहरू र विरोधीहरूका लागि कर्म गर्नेको कार्य नै जवाब हुनेछ। विगत 20 वर्षदेखि सत्तारुढ एसडीएफ पार्टी तथा राज्य सरकारले यही सिद्धान्तमा आफूलाई निरन्तर अघि बढाइरहेको पाइन्छ।

राज्यको विकासका लागि सरकारले कुनै कसर बाँकी छोडेको छैन, थाहा छ सबैलाई। राज्यलाई राष्ट्रदेखि अन्तरराष्ट्रिय तहसम्म परिचित गराउनसम्म सफल भएको छ। विश्‍वमा सिक्किमको छुट्टै पहिचान बनाउने अझ धेरै पूर्वाधार विकासमा लागि परिरहेकै छ सरकार। त्यसैका लागि हरेक राज्यवासीलाई आफ्नो अनुहार ऐनामा हेर्नसक्ने बनाउनेतिर ध्यानकेन्द्रित छ सरकार। ध्यानदिनुपर्ने कुरा, सत्तारुढ एसडीएफ, मुख्यमन्त्री पवन चामलिङको पारदर्शी विचार, दीरिघमियादी सोच र राज्य सरकारको पहलसित गहिरिएर राज्यवासीले पनि हैंसेमा होंस्टे मिलाउन सकेमात्र ताली बज्ने कुरा बुझ्नुपर्नेछ। कान छाम्नुपर्नेछ।

भन्न के खोजिएको भने विभिन्न आरोप-प्रत्यारोप र आक्षेपहरूलाई कुनै वास्तै नगरी राज्य सरकार आफ्नो वचनमा सिद्ध प्रमाणित बन्दै आइरहेको छ। कृषि-बागवाणी, पर्यटन, शिक्षा, स्वास्थ्य सबै क्षेत्रमा समानरूपमा काम गर्दै आइरहेको राज्य सरकारले सधैं झै फेरि 18 र 19 जनवरीको दिन ‘कृषि-बागवाणी प्रदर्शनी’ लगाइरहेको छ। अन्ततः ‘कृषि-बागवाणी प्रदर्शनी’-को मूल उद्देश्य भनेको पनि राज्य र राज्यवासीका लागि विकाससितै सरोकारको विषय हो। सिक्किमको उत्पादनलाई विश्‍वबजारसम्म पुर्याउने राज्य सरकारको सोच रहेकोले नै कृषि तथा बागवाणी क्षेत्रलाई सरकारले उच्च प्राथमिकता दिएर काम गरिरहेको छ। त्यसैको एउटा नमुना हो ‘कृषि-बागवाणी प्रदर्शनी’।

राज्यभरिबाट लगभग चारहजार कृषकहरूको उपस्थिति रहने सरमसा उद्यानमा आयोजन भइरहेको राज्यस्तरीय यस प्रदर्शनीमा कृषकहरूका लागि 11.43 लाख रुपियाँ नगत पुरस्कारको घोषणा पनि गरिएको छ। कृषकहरूलाई यसरी पुरस्कार राशिको घोषणा गर्नुभनेको अन्ततः उनीहरूलाई कृषि क्षेत्रमा प्रेरित गरिनु हो, राज्यमा अघिकभन्दा अधिक जागरुक गराउनु हो अनि आफ्नो गाउँ, आफ्नो समाज, आफ्नो राज्यलाई आफ्नो खुट्टामा उभ्याउनु हो। कुनै राज्य वा देश जब कृषि जगतमा अब्बल बन्दछ तब नै विश्‍वसमाजमा उभिन सक्छ। यसो भएपछि त्यहाँका जनता स्वतः गर्वमहशुस गर्नसक्नेछन्। वर्तमान राज्य सरकार र मुख्मन्त्री पवन चामलिङको ध्येय पनि यही हो। त्यसैले ‘कृषि-बागवाणी प्रदर्शनी’-मा 

प्रदर्शनीमा विभिन्न वर्गमा वागवाणी तथा कृषि उत्पादनहरूसहित बाँसद्वारा निर्मित हस्तकलाको पनि प्रदर्शन गराइँदैछ। यसका साथै  कृषकहरूका निम्ति नयाँ वैज्ञानिक तक्निकीबारे जानकारी पनि गराइने भएको छ। यसबाहेक कृषकहरूका लागि विभिन्न बिउ-विजन, औजार आदि उपलब्ध गराइने, विचारको आदान-प्रदान गराइने यस ‘कृषि-बागवाणी प्रदर्शनी’ त्यतिबेला मात्र सफल बन्नसक्छ, जतिबेला राज्यसरकारको सोच-विचार अनुरूप कृषकवर्गले पनि व्यवहारमा उतार्नेछन्। तर, यसलाई पुरस्कारसम्ममात्रै सीमित राखे अथवा कुनै सहुलियत प्राप्त गर्नेसम्ममात्रै सीमित राखे हाम्रो उद्पादन विश्‍वबजार कहिले पुग्ला र विश्‍वमा चिनिँदै गएको हाम्रो शिर कहिले ठाडो होला..? ‘कृषि-बागवाणी प्रदर्शनी’-सितै हामीले हाम्रो दायित्व पनि बुझ्न जरुरी हुन्छ। यसो गर्नसकिए न काग गराकै सुनिरहनुपर्छ न त कान छामिरहनुपर्ने आवश्यकता।-17.01.2014