सन्दर्भ : एसडीएफको स्थापना दिवस

सिक्किम प्रजातान्त्रिक मोर्चा (एसडीएफ)-को निम्ति अहिले 4 मार्चले धेरै महत्व बोकेको छ। सिक्किम र सिक्किमवासीको समग्र विकासमा प्रजातान्त्रिक ढङ्गले अघि बड्ने उद्देश्य राखेर यसै दिन 1993-मा स्थापना भएको थियो सिक्किम प्रजातान्त्रिक मोर्चा। पवन चामलिङको दूरदर्शी विचार र जनपक्षीय सङ्कल्पहरूको साथमा स्थापित यो पार्टीले आफ्नो स्थापनाको एकवर्षपछि नै सरकार गठन गरेको थियो। पार्टीको जुन उद्देश्य, सङ्कल्प र उद्देश्य थिए, त्यसैको अवधारणामा रहेर सिक्किम र सिक्किमे नागरिकहरूको पक्षमा काम गर्दै आइरहेकोले नै अहिलेसम्म पार्टीले आफ्नो सरकारलाई निरन्तरता दिनसकिरहेको छ।

अहिले 4 मार्च अथवा पार्टी स्थापना दिवस पालनको निम्ति सम्पूर्ण पार्टी कार्यकर्ताहरू लागि परिरहेका छन्। राज्यका चारै जिल्लमा अहिले पार्टी स्थापना दिवस आयोजनको तयारीका लागि व्यापकरूपमा प्रचार-प्रसार भइरहेको छ। पार्टी स्थापना दिवसलाई कसरी पालन गरिनुपर्ने, के-के काम गर्नुपर्ने जस्ता विषयहरूमा चर्चा-परिचर्चा चलिरहेको छ। पार्टी स्थापना दिवसलाई कसरी सफल आयोदन गर्न सकिन्छ भन्ने विषयका साथै सदस्यता नवीकरण, पूर्ण जिम्मेवारी वहन र नयाँ सदस्यता ग्रहणलाई पनि प्रमुखता दिइरहेको पाउन सकिन्छ। ‘पार्टीप्रति समर्पित  कार्यकर्ता’ अनि ‘जनसेवाको निम्ति पार्टी’ दुवैका लागि यी कुराहरू अति आवश्यक पनि हुन्।

माथि उल्लेख विषयहरूसितै अब जनताका लागि के-के काम गर्न आवश्यक छ? गरिरहेका कार्यहरू व्यावहारमा कतिसम्म परिणत छ कि छैन? जुन काम गरिँदैछ ती सबैबाट तृणमूलस्तरसम्मका जनताले लाभ उठाइरहेका छन् कि छैनन्? भन्ने कुराहरूमाथि पनि खुल्ला वहश वा छलफल हुनसके अझ असल हुने देखिन्छ।

कुनै पनि पार्टीले तृणमूलस्तरसम्म गएर जनताको सेवामा कतिसम्म इमान्दार छ, त्यसमा त्यसले पार्टीको स्थायित्वसित पनि सम्बन्ध राखेको हुन्छ। त्यसैले कार्यकर्ताहरूले तल्लोतहसम्म पुगेर कहाँ-कहाँ के-के काम भइरहेको छ र के-के हुन बाँकी छ? हुनपर्ने कुनै काम भइरहेको छैन भने त्यसका कारणहरू के-के हुन्? ती कुराहरू बुझेर समाधान गर्नुपर्ने अथवा आम नागरिकको आवाज भइदिएर काम गर्न सक्नुपर्ने कुरामा पनि चर्चा हुन जरुरी हुन्छ। यसका साथै तल्लोतहदेखि माथिल्लो तहसम्मका पार्टी कार्यकर्ताहरूमा पनि ‘चेन सिस्टम’ रहनसके ग्रामस्तरदेखि नै राज्यको समान्तर विकासको आशा राख्न सकिन्छ।

यसका साथै पार्टीले सरकारसित कसरी तालमेल राखेर काम गर्न सक्छ अनि जनताको कुनै पनि काम वा समस्या भए त्यसलाई कसरी समाधान गर्न सकिन्छ भन्ने कुरामा पनि चर्चा हुन जरुरी हुन्छ। किनभने पार्टी कार्यकर्ता भनेको समाजका हरेक तप्कासित सिधा सम्पर्कमा रहेर काम गर्न सकिने सजिलो माध्यम पनि हो। सत्तारुढ एसडीएफले आगामी दिनहरूमा यस्ता कुनै विषय छुटेका भए ती कुराहरूमा पनि केन्द्रित रहने जनविश्‍वास बलियो बसोस।-26.02.2016