म (कविता)

-अर्जुन  ‘'यावा’
सुसेलीदेउ तिमी
छाइदिन्छु शितलता म
थकाई मेट जति चहान्छौ तिमी,
यदि गर्छौं कुनै गल्ति भने
हुरी बनिदिन्छु तिमीलाई उड़ाउन म।

तिर्खा मेट तिमी
भरिदिन्छु अञ्जुली म
पिई रहनु जति चहान्छौ तिमी,
यदि गर्छौ फोहोर तिमी भने
नदी बनीदिन्छु तिमीलाई बगाउन म।

सल्काउ मलाई तिमी
जलिदिन्छु चुल्हाभरि म
तयार गर भान्सा जहिलै तिमी,
यदि गर्छौ डाहा तिमी भने
अग्नी भइदिन्छु तिमीलाई जलाइन म।

खोज मलाई तिमी
छरिदिन्छु शान्ति तनमनमा म
स्वर्ग यहीँ छ, किन खोज्नुपर्यो?
अन्याय, अत्याचार, अशान्ति यदि ल्याउँछौ भने
विनाशक बनिदिउँला, नठान कहिले कमजोर छु म।
-20 जनवरी, 2012